«Առավոտվանից սկսած կրակոցները չեն դադարում, այս պահին էլ մեծ տրամաչափի զենքերից խփում են մեր դիրքերին»,- Oragir.News-ի հետ զրույցում ասաց Սոթքի բնակիչներից Արմեն Մարտիրոսյանը։ Տղամարդու խոսքով՝ դիրքերի ուղղությամբ կրակոցներն ամեն օր էլ լինում են, բայց այսօր դրանք ինտենսիվ են, հիշեցնում են այս տարի մայիսի 12-ին տեղի ունեցածը։

«Հիմա բակում՝ տան առաջ նստած եմ, դրսում մարդ չկա, վախենում են, որ կարող է ադրբեջանցիները թեքվեն գյուղի վրա ու արկ գցեն։ Գյուղացիներից մի քանիսը վախից երեխեքին տարել են Վարդենիս, բայց այնպես չէ, որ գյուղը դատարկվել է, բնակիչները տեղում են, տարհանում չի եղել»,- իրավիճակը ներկայացրեց Սոթքի բնակիչը։ Տղամարդու հետ հեռախոսազրույցի ընթացքում մի քանի անգամ լսվեցին կրակոցի բարձր ձայներ։ «Լսեցի՞ք, սա հաստատ հրետանի է, փոքր տրամաչափից այսպիսի ձայն չէր գա, ոչ էլ նման դղրդոց կլիներ։ Չորս կողմից կրակում են, չգիտենք՝ վերջն ինչ է լինելու»,- ասաց Սոթքի բնակիչը։ Oragir.News-ը Սոթքի բնակչի հետ զրուցել է ժամը 13։45-ին։

Ավելի վաղ ՊՆ-ն հայտնել էր, որ Ադրբեջանի պաշտպանության նախարարությունը, օգոստոսի 31-ին պարբերաբար ապատեղեկատվություն տարածելով ու այդպիսով հերթական սադրանքի համար տեղեկատվական հիմք ստեղծելով, սեպտեմբերի 1-ին՝ ժամը 07:50-ից սկսած, ինտենսիվ կրակ է բացել Սոթքի հատվածում տեղակայված հայկական դիրքերի ուղղությամբ, այդ թվում ականանետերից: Սոթքի հատվածում տեղակայված հայկական դիրքերի ուղղությամբ Ադրբեջանի ԶՈՒ կրակի հետևանքով հայկական կողմն ունի 2 զոհ, 1 վիրավոր: