Հայաստանի ամենահայտնի գործարարներից մեկը՝ Ազգային ժողովի նախկին պատգամավոր Սամվել Ալեքսանյանը, հայտնվել է խոշոր սկանդալի կենտրոնում։ Ռուսական իշխանությունները նրան թույլ չեն տվել մտնել Ռուսաստանի տարածք։ Այս մասին հայտնում են 24News-ի մոսկովյան աղբյուրները։
Համաձայն աղբյուրների, Ալեքսանյանը, իր տիկնոջ՝ Շողերինայի, և ընտանիքի այլ անդամների հետ մեկնել է Մոսկվա՝ մասնակցելու ընկերական հարսանիքի։ Սակայն, երբ նրանք ժամանել են Մոսկվայի օդանավակայան, ընտանիքի բոլոր անդամներին թույլ են տվել հատել սահմանը, իսկ Ալեքսանյանին մի քանի ժամ պահել են օդանավակայանի տարածքում։ Արդյունքում, ռուսական իշխանությունները հայտնել են, որ նա չի կարող մուտք գործել երկիր, և ստիպված է եղել վերադառնալ Հայաստան։
Նշվում է, որ այս արգելքը կարող է երկար ժամանակ գործել, բայց պատճառների մասին դեռևս մանրամասներ չեն հաղորդվում։ Արդյոք սա կապված է Ալեքսանյանի բիզնես գործունեության, թե այլ պատճառների հետ, առայժմ մնում է անհայտ։
Գործարարը և նրա տիկինը այս պահին չեն արձագանքել հեռախոսազանգերին, իսկ լրատվամիջոցները շարունակում են փորձել պարզել այս սկանդալային միջադեպի մանրամասները։