SHAMSHYAN.com-ի տեղեկություններով՝ փետրվարի 8-ին արտակարգ դեպք է տեղի ունեցել Սյունիքի մարզում։ Ժամը 19:00-ի սահմաններում «Մեղրիի ՏԲԿ»-ից ահազանգ է ստացվել ՀՀ Ներքին գործերի նախարարության Ոստիկանության Մեղրիի բաժին և հայտնել են, որ «աջ սրունքի ստորին երրորդականի օտար մարմին, օդապոմպային զենքի գնդակ» ախտորոշմամբ իրենց մոտ է տեղափոխվել մի երեխա։
Ինչպես հայտնում է ֆոտոլրագրող Գագիկ Շամշյանը, հիվանդանոց է մեկնել ոստիկանության Մեղրիի բաժնի խումբը՝ համայնքային ոստիկանության բաժանմունքի ավագ տեսուչի գլխավորությամբ։
Տեղում պարզվել է, որ վիրավորը Սյունիք մարզի բնակիչ 14-ամյա Հրայր Ս.-ն է։
Մինչ բժիշկները օգնություն էին ցուցաբերում երեխային, Մեղրիի ոստիկանները պարզել են, որ նույն օրը՝ ժամը 16:20-ի սահմաններում, Հրայր Ս.-ն Ագարակ քաղաքի Չարենցի փողոցում աջ ոտքի հետնամասում ցավ է զգացել և ժամը 17:00-ի սահմաններում նրան հայրը տեղափոխել է «Մեղրիի ՏԲԿ»։
Մեղրիի ոստիկանների կողմից ձեռնարկված օպերատիվ-հետախուզական միջոցառումների շնորհիվ պարզվել է, որ Հրայր Ս.-ի առողջությանը թեթև մարմնական վնասվածք է պատճառել Սյունիքի մարզի բնակիչ,15-ամյա Արտյոմ Պ.-ն՝ իր հոր՝ 43-ամյա Սամվել Պ.-ին պատկանող օդաճնշիչ հրացանով և կրակոց է արձակել։
Ժամեր անց Սամվել Պ.-ն նշված հրացանով ինքնակամ ներկայացել է ոստիկանության Մեղրիի բաժին, որտեղ դեպքի փաստով փաստաթղթեր են կազմվել և դրանք փոխանցվել են Հայաստանի Քննչական կոմիտեի Սյունիքի մարզային քննչական վարչություն։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։
ՄԱՆՐԱՄԱՍՆԵՐԸ՝