Ինչպես տեղեկացնում են ՀՀ գլխավոր դատախազությունից՝ 2022 թվականի հունիսի 28-ին Երևան քաղաքի առաջին ատյանի ընդհանուր իրավասության դատարան է ներկայացվել ապօրինի ծագում ունեցող գույքի բռնագանձման վերաբերյալ տասներկուերորդ հայցադիմումը, որն 2022թ. հուլիսի 11-ին ընդունվել է վարույթ։

«Ընդունված վարույթի համաձայն՝ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունը պահանջ է ներկայացրել դատարանին Մանվել Գրիգորյանի ժառանգներից և նրան փոխկապակցված անձանցից ի օգուտ Հայաստանի Հանրապետության՝ բռնագանձել մասնավորապես՝

Թվով 28 անշարժ գույքեր, որոնք գտնվում են Հայաստանի Հանրապետության տարածքում, 16 տրանսպորտային միջոցներ։ Դրանց անհնարինության դեպքում՝ բռնագանձել դրանց միջին շուկայական արժեքները։ Այն ընդհանուր կազմում է ավելի քան 552.000.000 ՀՀ դրամ, ինչպես նաև մասնակցություններ թվով 6 իրավաբանական անձերում:

Ընդհանուր 160.803 ՀՀ դրամ փոխառությունների պահանջի իրավունքը, որոնք տրվել են իրավաբանական անձանց։

Որպես ապօրինի դրամական միջոցների մնացորդ՝ 236.606 ՀՀ դրամ, ավանդների մնացորդ՝ 18.656.316 ՀՀ դրամ, ինչպես նաև 17.027.871 ՀՀ դրամ, որն անձի օրինական եկամուտներով չի հիմնավորվում և ունի ապօրինի ծագում, ինչը հնարավոր չէ բռնագանձել՝ հիմք ընդունելով ապօրինի ծագում ունեցող գույքի բռնագանձման մասին օրենքի 20-րդ հոդվածի 4-րդ մասը: